Ratification de la sentence arbitrale rendue le 24 novembre 1344 (cf. infra. n° 564, non conservé mais copié dans l'acte présent), solutionnant par une transaction, les dissensions entre les seigneurs de Ribeaupierre au nom des habitants d’Orbey d’une part, et l’abbaye de Pairis d’autre part, réglant leurs droits respectifs sur les eaux (Rivière-Rouge), pêches, pâturages, forêts (Buchholz, Schwarzenberg) et chemins. Vidimé par la ville de Colmar en 1347, 12^ème abende nach Winahten (cf. Ad 68 – 11 H 11, sceau perdu).

Harüber zü eim offenen vrkünd, daz dis von vns den vorgenanten beiden teilen veste, war vnd stete belibe iemerme, in alle wis, als da vor gescriben stat, so hant wir die vorgenanten her Heinrich vnd her Johans von Rapoltstein vnd wir die vorgenanten der apt vnd der covent von Peris vnserù eigenn insigel gehenket an disen brief.

Vnd wand wir die vorgenanten herren von Rapoltstein die vorgescribenn ding hant alsus gelopt stete ze habend für vns vnd alle vnser erben vnd öch für vnser lüt, so hant wir Johansen von Rapoltstein den jungen, minen des vorgenanten Johans von Rapoltstein sun, solich gehebt, daz öch er zü eim vrkünd vnd merrer sicherheit der vorgescribener ding sin insigel het gehenket an disen brief.

Dar zü so hant wir die vorgenanten der apt vnd der couent von Paris durch ein merre kuntschaft der vorgescriben ding gebetten den erwirdigen vnsern lieben herren den apte von Lützel sin insigel henken an disen brief, vnd darzü, wand vnser der vorgeschribener beider teil vollekomener wille ist, daz die vorgescribenù ding veste vnd wär sient vnd belibent, so hant wir durch ein merre kuntschaft gebetten die wisen vnd bescheidenn den schultheissen, den burgermeister vnd den rat ze Colmer ir stette insigel vnd dar zü die vorgenanten her Syfrid Schultheissen, Johansen von Wittenhein vnd Wernlin von Limperg, die öch warent der vorgescribener sache, ir eigenù insigel henken an disen brief.

Wir Johans von Rapoltstein der junge, herre in der Nidern stat ze Rapoltzwilr, des vorgenanten her Johans von Rapoltstein sun, vnd ich der vorgenante der apte ze Lützeln vnd wir der schultheisse, der meister vnd der rat ze Colmer von der stette wegen ze Colmer, vnd wir Syfrid Schultheis, ritter, Johans von Wittenhein, ein edel kneht, vnd Wernli von Limperg vergehent, daz wir durch bette willen der vorgenanten herren von Rapoltstein vnd öch des aptes vnd des couentes ze Peris zü eim vrkünd der vorgesceribener ding disen brief mit vnsern insigeln hant besigelt.

Acte édité in: K. Albrecht, Rappolsteinisches Urkundenbuch I, n° 571, p. 444-446.