darumbe hant wir die vorgenanten personen unsere ingesigele gehencket an disen brief

Transcription tirée de l'Urkundenbuch der Stadt Strassburg, vol. 2, p. 264, n° 314.

Wir Hug Senfteleben, Hug Fúlle, Albereht von Útenheim, Wernher Gnipping, Willehelm Rústelin, Fritscheman von Westhus rittere, Egenolf von Útenheim, Willehelm von Borre, Cůntze von Schoͧwenburg und Hennin von dem Steine tůnt kunt allen den, die disen brief gesehent und gehoͤrent lesen, daz wir lieplich und guͤtlich vur uns, Johannese Vogeten von Útenheim und alle sine und unsere frúnde verrihtet und verslihtet sint, und eine stete sůne hant und gelobent die oͧch stete ze habende hinnen fúrderme in gůten trúwen mit den erebern und bescheiden herren dem meistere dem rate und den burgern gemeinlich von Strasburg von Johanneses Vogetes gevengnisse wegen des vorgenanten, den die vorgenanten burger von Strasburg gevangen hettent. wir gelobent oͧch unverscheidenliche, daz wir die vorgenanten burger von Strasburg und die stat niemer súllent angriffen noch schadegen noch schaffen angegriffen noch geschadeget in keine wis von der vorgenanten getete wegen. wer aber, des wir nút getrúwent, daz wir oder ieman von unsern wegen oder der vorgenante Johannes oder ieman von sinen wegen, wurde er joch in ein closter getan und dannen uslieffe, und die vorgenante stat oder burger angriffent oder schadegetent von der vorgenanten getete wegen und daz kúntlich wurde gemaht vor meister und vor rate zů Strasburg mit erebern biderben lúten, so gelobent wir und sint schuldig worden unverscheidenlich den burgern von Strasburg abe ze legende und abe ze tůnde und uf ze rihtende elleclich und gar ane alle geverde. und daz dis war und stete sie, darumbe hant wir die vorgenanten personen unsere ingesigele gehencket an disen brief. der wart gegeben an dem mendage nach sante Gleristage in dem jare, da men von gotz gebúrte zalte drúzehen hundert jar und vierzehen jar.